ፕረዚደንት ኣልጀርያ ነበር ቡጠፍሊቃ ዓሪፉ።

ፕረዚደንት ኣልጀርያ ነበር: ዓብደልዓዚዝ ቡጠፍሊቃ: ንንውሕ ዝበለ ግዜ ሓሚሙ ድሕሪ ምጽናሕ ኣብ መበል 84 ዓመቱ ሎሚ ቀዳም ዓሪፉ።

ንዕስራ ዓመታት ንኣልጀርያ ዝመርሐ ቡጠፍሊቃ: ንመበል ሓሙሻይ ግዜ ክመርሕ ኣብ ዝነቐለሉ ብዝተላዕለ ህዝባዊ ናዕቢ: ኣብ 2019 ካብ ስልጣን ምውራዱ ዝዝከር እዩ። ኣብ 1999 ኣልጀርያ 200 ሽሕ ሰባት ካብ ዝቐዘፈ ሕሱም ውግእ ሕድሕድ ወጺኣ ቡጠፍሊቃ ብድፍኢት እቲ ወተሃደራዊ ሓይሊ: ፕረዚደንት እታ ሃገር ምዃኑ ጸብጻባት የመልክቱ።

ቡጠፍሊቃ: ኣብ 2013 ድሕሪ ዘጋጠሞ ወቕዒ: ሳሕቲ እዩ ኣብ ህዝቢ ዝረአ ኔሩ። እዚ ድማ ብሰንኪቲ ሕማም ልሳኑን መሓውሩን ተሃስዮም ብምንባሮም እዩ። ቡጠፍሊቃ ኣብቲ ኣብ 1950ታትን 60ታትን እተኻየደ ምንቅስቓስ ናጽነት ኣልጀርያ ዓቢ ተራ ከም እተጻወተ ዝፍለጥ እዩ።