Olaf Scholz (AP Photo/Markus Schreiber, Pool)
ሰልፊ ሶሻል ዲሞክራት ኣብ ልዕሊ ብኣርሚን ላቸት ዝምራሕ ዓቃባዊ ሰልፊ ጸብለልታ ኣርእዩ ምህላዉ: ክትዕ እዞም ሰልፊታት ብተሌቪዥን ቅድሚ ምትሕልላፉ: ኣብ ዝተኻየደ ሓደ ዳህሳስ: ተመልኪቱ ክብል ማዕከን ዜና ተተ ሓቢሩ።
ብሰንበት ምሸት ኣብ ዝተኻየደ ክትዓት: እቶም ሰለስተ ቀንዲ ሕጹያት: ማለት ኦላፍ ሾልዝ ካብ ሰልፊ SPD፥ ኣርሚን ላሼት ካብ ቀጽሪ ዓቃባውያን (CDU) ከምኡ ውን ኣናሌና ባኤርቦክ (ካብ ሓምላይ ሰልፊ): ድሕሪ ምስንባት ኣንገላ መርከል: ስልጣን ቻንስለርነት ንምጭባጥ ክወዳደሩ እዮም።
ብመሰረት Insa ዘካየዶ ዳህሳስ: ሰልፊ SPD ካብ ዝሓለፈ ሰሙን ብ 1% ብምውሳኽ ናይ 26% ናይ ህዝቢ ደገፍ ረኺቡ ኣሎ። ድሕሪ 2017 SPD ክንድዚ ዝኣክል ደገፍ ክረክብ እዚ ፋልማዩ እዩ።
ሰልፊ ቀጽሪ ዓቃባውያን: ዝረኸቦ ደገፍ ከየተቐየረ: ኣብ 20% ክረክብ እንከሎ ሓምላይ ሰልፊ: 15% በጺሑ’ሎ።
ብዙሓት ሰባት ንመን ክመርጹ ከም ዘለዎም ገና ከም ዘይወሰኑ ዝገለጸ ላሼት እዚ ኣዝዩ ኣገዳሲ ምርጫ ምዃኑን ክሳብ 26 መስከረም ዝበዝሐ ድምጺ ንምርካብ ሰልፉ ኣብ ተሸብሸብ ምህላዋን ንሬድዮ DLF ገሊጹሎ።
