ጀርመን፡ ንባንዴራ ጉጅለ ሓማስ፡ ክትእግድ ከምእትደሊ ገሊጻ

ብዓቃባውያን ሰልፍታት CDU / CSU ን ሶሻል ዲሞክራትን (SPD) ዝቖመ መንግስቲ ጀርመን፡ ንባንዴራ ናይ ግብረ ሽበራዊ ፈሌስጤማዊ ጉጅለ ሓማስ፡ ክትእግድ ከምእትደሊ ማዕከን ዜና ጀርመን ዜት ኦንላይን ገሊጹ ክብል ማዕከን ዜና ተተ ኣቃሊሑ።

ነዚ ጉዳይ ብዝምልከት፡ ኣብ መጀመርታ ወርሒ ሰነ፡ ምስ ሰልፊ CDU ዝርርብ ጀሚርና ኣለና ክብል ወሃብ ቃል ሰልፊ (SPD)፡ ዮሃንስ ፌችነር ንመርበብ ዜና RND ሓቢሩ።

ሕጊ ጀርመን፡ ኣርማታት፡ ናይ ዘይወግዓውያን (ዘይቅዋማውያን) ውድባት ከምዘየፍቅድ ዝገለጸ ፌችነር፡ እቲ ሕጊ፡ ኣብ ልዕሊ ናይ ግብረ ሽበራውያን ኣርማታት ውን ዝሰርሕ ከይከውን መጽናዕቲ ይካየድ ምህላዉ ሓቢሩ።

ኣብ ቀረባ እዋን፡ ኣብ ጀርመን፡ ኣንጻር ሴማውያን (anti-Semitism) ዝካየድ መጥቃዕታት፡ እናበዝሐ ይኸይድ ምህላዉ ይፍለጥ።

እቲ እገዳ እንተድኣ ኣብ ግብሪ ክውዕል ክኢሉ፡ ናይ ኩርዳዊ ጉጅለ ኣርማ ውን ክእገድ ከምዝኽእል ጸብጻባት ይሕብሩ።