ድሕሪ ናይ “ቲም” ጉዳይ፡ ንሰርሓሉ ዘለና ሕጊ ክግምግም እደሊ እየ

ሰልፊ ሊበራልና፡ ነቶም ኣብ ውሽጢ ሽወደን ተኣለይቲ ኮይኖም መንበሪ ፍቓድ ዝሓቱ ዘለዉ ህጻናት ብዝምልከት፡ ዝያዳ ናይ ምክልኻል ሓላፍነቱ ከሐይል ከምዝደሊ ዝገልጽ እማመ ኣቕሪቡ ክብል፡ ማዕከን ዜና ተተ ሓቢሩ።

ሰልፊ ሊበራልና፡ ነቲ ብዛዕባ እዞም ህጻናት ዝምልከት፡ ዝስራሓሉ ዘሎ ሕጊ፡ ከምእንደገና ክግምግሞን ዳግመ ግምት ክገብረሉን ከምዝደሊ ገሊጹ።

ህጻናት፡ ምስቲ ዝቕመጥዎ ዘለዉ ስድራቤት ዘለዎም ርክብ ኣብ ግምት ብምእታዉ፡ ኣብ ሽወደን ንኽተርፉ ዘኽእሎም ክኸውን ይግባእ ክትብል፡ ጸሓፊት ሰልፊ ሊበራልና፡ ዩኖ ብሉም፡ ገሊጻ።

እዚ ሕጊ፡ ዳግመ ግምት ንኽግበረሉ፡ ኮሚቴ ማሕበራዊ ውሕስነት ባይቶ ሽወደን፡ ነቲ ጉዳይ ብምብግጋስ፡ ንመንግስቲ ክሓትት ትጽቢት ይገብር ክትብል፡ ብሉም፡ ገሊጻ።

እዚ ዝኾነሉ ዘሎ ምኽንያት፡ ሓደ ወዲ ሰለስተ ዓመት፡ ቲም ዝተባህለ ህጻን፡ ምስ ሓንቲ ስድራቤት፡ ካብ ወዲ ኣርባዕተ ኣዋርሕ ኣብ ሽወደን ክእለ ዝጸንሐ ከንሱ፡ ናይ መቦቀል ሃገሩ፡ ናይጀርያ፡ ንኽምለስ ድሕሪ ዝተመሓላለፈ ውሳኔ ምዃኑ እዩ ዝሕበር።