ዞባታት ኣብ እዋን ዕረፍቲ ሳመር ዝፍጠር ሃጓፍ ኣባላት ስታፍ ንምምላእ ይጽዕራ።

ኣብ ዝመጽእ ኣዋርሕ ሳመር፥ ስሩዓት ነርስታትን ካልኦት ሰራሕተኛታቶም ንዕረፍቲ ስለ ዝወጹ፡ እዚ ሃጓፍ ንምሽፋን እኹላት
ነርስታት ንምቚጻር ኣብ ጻዕሪ ከም ዝርከቡ፥ ብርክት ዝበሉ ሰብመዚ ክንክን ጥዕና ዞባታት ገሊጾም። ምስ ዓሚ ብምውድዳር፥
ኣብዚ ዓመት ስሩዓት ሰራሕተኛታት ንዕረፍቲ ኣብ ዝወጽሉ እዋን ዝፍጠር ሃጓፍ ናይ ምሽፋን ዕድል ዝኸፍአ ምዃኑ ፡ ሬድዮ ሽወደን
ነዚ ኣመልኪታ ኣብ ሓሙሽተ ካብተን ዕስራን ሓደን ዞባታት ሽወደን ኣብ ዘካየደቶ ዳህሳስ ኣጣሊላ።
“ዓሚ ብምኽንያት እዚ ክስተት ካብ ሰዓት 7 ንግሆ ክሳብ ሰዓት 10 ኣብ ዘሎ ነዊሕ ሰዓታት ክንሰርሕ ተገዲድና ኔርና” ክትብል
ኣብ ሆስፒታል ማልመ ኣብ ኣሃዱ ጽዑቕ ክንክን እትሰርሕ ነርስ ሳንድራ ሆንስትሮም ትዝክር።
ብፍላይ ድማ ነርስታት ንንውሕ ዝበለ ግዜ ኣብ ስራሕ ክጸንሓ ምግባር ዝዓበየ ጸገም ምዃኑ እቲ ዳህሳስ ኣመልኪቱ’ሎ።