ወተሃደራት ዩክሬይን ኣብ ሆስፒታል ዩኒቨርሲቲ ካሮሊንስካ ይሕከሙ።

ክብድ ዝበለ መቚሰልቲ ኲናት ዘጋጠሞም ሓሙሽተ ዩክሬናውያን ወተሃደራት፡ ናብቲ ኣብ ሶልና ስቶክሆልም ዝርከብ ሆስፒታል ዩኒቨርሲቲ ካሮሊንስካ ንሕክምና ከም ዝመጹ ተሓቢሩ። መጒዳእቶም ኣብቲ ብድርዒ ዘይሽፈን ክፋል ኣካላቶም፡ ማለት መሓውራት ዝተኸስተ ኮይኑ፡ ንሞት ኣሕሊፉ ዝህቦም ከም ዘይኮነ ሬድዮ ሽወደን ገሊጻ’ላ። ቊጽሮም ክንደይ ምዃኑ እኳ እንተዘይተፈልጠ፡ ካብ ዩክሬይን ዝያዳ ሕሙማት ክመጹ እዮም ዝብል ትጽቢት ምህላዉ እውን ተፈሊጡ። “ብዛዕባ ኣሃዛት ልክዕ ሓበሬታ የብልናን፡ ግና ገዚፍ ጠለብ ከም ዘሎ ንፈልጥ ኢና” ክትብል ሊና ፎሽ ካብ ኤጀንሲ ህዝባዊ ድንገታት (MSB) ገሊጻ’ላ።