ብሰንኪ ቅልውላው ቫይረስ ኮሮና፡ ሽወደናዊ ኩባንያ ቮልቮ፡ ን650 ሰራሕተኛታት ከምዘሰናበተ ኣፍሊጡ። ክሳብ መወዳእታ ናይዚ ዓመት፡ 300 ኣማኸርቲ ናይቲ ኩባንያ ከፋኑ ወሲኑ ከምዘሎ ሓቢሩ ኣሎ።
ክሳብ መወዳእታ ናይዚ ዓመት፡ ድምር ብዝሒ ናይቶም ካብ ስራሕ ዝሰናበቱ ሰባት ክሳብ 1300 ክበጽሕ እዩ ክትብል ሓላፊት ዓቕሚ ሰብ እቲ ኩባንያ፡ ሃና ፋይር፡ ሓቢራ።
ኣብ ካልኣይ ርብዒ ናይዚ ሒዝናዮ ዘለና ዓመት፡ ኩባንያ ቮልቮ፡ ናይ 90 ሚልዮን ክሮን ክሳራ ከምዘርኣየ ጸብጻባት ሓቢሮም። ኣብ ተመሳሳሊ እዋን ናይ ዝሓለፈ ዓመት፡ ኩባንያ ቮልቮ፡ ናይ 14.6 ቢልዮን ክሮን መኽሰብ ኣመዝጊቡ ከምዝነበረ ይዝከር።
ይኹን እምበር፡ ሽሕ’ኳ ቅልውላው ኮሮና ንመሸጣ ኩባንያ ቮልቮን ንኻልእን ብኣሉታ ጸልይዎ እንተኾነ፡ ኣብ መወዳእታ ናይዚ ዓመት፡ መጠን መሸጣ ኩባንያ ከምቲ ኣብ ዝሓለፈ ዓመት ዝነበረ፡ 700 ሽሕ መካይን፡ ክበጽሕ ትጽቢት ከምዘሎ ኣካያዲ ስራሕ፡ ሆካን ሳሙዌልሰን፡ ገሊጹ።
