ኣብ ዩክሬይን ገበናት ኲናት ዝፈጸሙ ክሕተቱ እዮም ተባሂሉ።

ካብ ጎደና ቡቻ ዩክሬይን ዝተረኽበ ስእሊ ዝወደቑ ሬሳታት ሲቪላውያን ኣብ ዓለም ከቢድ ስምባደ ድሕሪ ምፍጣሩ ሽወደንን ካልኦት ሃገራትን ኣብ ዩክሬይን ዝፍጸም ዘሎ ገበናት ኲናት ክምርመር ዝብል ሓሳባት ኣንቂደን ምህላወን ሬድዮ ሽወደን ጸብጺባ።

እዚ እናኾነ ነዞም ከምዚ ዝበለ ዘስካሕክሕ ገበን ዝፈጸሙ ሰባት ናብ ፍርዲ ናይ ምቕራብ ተኽእሎታት ከመይ ዝበለ እዩ ዝብል ሕቶ ተላዒሉ’ሎ። ዳይረክተር ሕጋዊ ጒዳያት ናይቲ ኣብ ስቶክሆልም ዝመደብሩ ውድብ ኣህጒራዊ ሰብኣዊ መሰላት ሽቶፈር ነዚ ኣመልኪቱ ኣብ ዝሃቦ ሓበሬታ ከምዚ ዝበለ ን ሰላማውያን ሰባት ኮነ ኢሉ ሸቶ ዝገብር ህልቂት ዝፈጸሙ ሰባት ኮይኖም ውዒሉ ሓዲሩ ኣብ ሕጊ ምቕራቦም ዘይተርፍ እዩ ኢሉ። ንተፈጸመ ገበናት ምጽራይ ጥራይ ዘይኮነ ኣብ መሳልል እዝዚ ነዚ ኮነ ኢሎም ዝፈጸሙ ሰባት ምልላይ እውን ኣገዳሲ እዩ፡ እዚ ንምግባር ድማ ነቲ ገበነኛ ብኣካል ምሓዝ ከድሊ እዩ። ኣህጒራዊ ማህበረሰብ ን ጒዳይ ዩክሬይን ኣዝዩ ዓብዪ ኣቓልቦ ሂብዎ ብምህላዉ እዚ ናይ ሕጊን ፍትሒን ጒዳይ ተስፋ ዘለዎ እዩ ኢሉ’ሎ–ሽቶፈር።