ብረቡዕ ወጋሕታ፡ ሰዓት ኣርባዕተ ናይ ንግሆ፡ ኣብ ኖርወይ፡ ምምሕዳር ያርድሩም (Gjerdrum) ዝርከብ ኣስክ (Ask) ዝተባህለ ከባቢ፡ ድሕሪ ዘጋጠመ ሓደጋ ምህማም መሬት፡ ዝደሓኑ ንምርካብ ዝካየድ ዘሎ ጻዕሪ ቀጻሊ ምህላዉ ተፈሊጡ።
ክሳብ ሕጂ፡ ዓሰርተ ዝኾኑ ሰባት ክሞቱ እንከለዉ፡ ሰለስተ ግን ክሳብ ሕጂ ሃለዋቶም ስለዘይተፈልጠ ኣብ መስርሕ ምድላይ ይርከቡ።
ኣብቲ እዋን ሓደጋ፡ ካብ ገዝኡ ዝተመዛበለ፡ ኢቪንድ ዶሊን፡ ብሰንኪ እቲ ዘጋጠመ፡ ሰባት ምሟቶም ዘስካሕክሕ ተርእዮ እዩ ድሕሪ ምባል፡ ነቶም ዝደሓንና ግን ኣበይ ከምንነብርን መን ከምዝሕግዘናን ግን ሓርቢቱና ኣሎ ክብል ንመርበብ ሓበሬታ ኖርወይ ብምጥቃስ ሬድዮ ሽወደን ኣቃሊሑ።
ኣብ ከባቢ ኣስክ (Ask) ዝርከብ ዓይነት ሓመድ፡ ባህርያቱ ዝቕይር ኮይኑ ካብ ደረቕ ናብ ፈሳሲ ዝዓይነቱ ጭቃ ዝቕየር ኮይኑ፡ ኣብ ዝሓለፈ ዓመታት፡ ብተደጋጋሚ ከምዚ ዓይነት ተርእዮታት ከጋጥም ከምዝጸንሐ ይፍለጥ። ይኹን እምበር፡ ጠንቂ ናይቲ ኣብ መወዳእታ እዋን ዘጋጠመ ሓደጋ፡ ከምዘይተፈልጠ ተገሊጹ።
ኣብቲ ናይ ሂወት ምድሓን መስርሕ፡ ሽወደን፡ ብክኢላታትን ብንዋትን ትሳተፍ ከምዘላ ተፈሊጡ።
