ኣብ ቀዳማይ ፍርቂ ናይ ዓመተ 2020፡ ብዛዕባ ኣብ ልዕሊ ደቂ ኣንስትዮ ዝተፈጽሙ ጎነጻዊ ገበናት ዝሕብሩ ኣስታት 14100 ጥርዓናት ከምዝተራእዩን ምስቲ ኣብ ተዛማዲ እዋን ናይ ዓመተ 2019 ዘጋጠሙ ተመሳሰልቲ ተርእዮታት ክነጻጸር እንከሎ ብ 4% ከም ዝዛየደ ወግዓውያን ጸብጻባት ኣሃዱ ምክልኻል ገበናት፡ Brå፡ ሓቢሮም።
ጥርዓናት ዓመጽ (ምግሳስ) ድማ ብ3% ምውሳኹ እቶም ጸብጻባት ብምውሳኽ ሓቢሮም።
ኣብ እዋን ቅልውላው ኮሮና፡ እተን ትሑት ዓቕሚ ዘለወን ደቂ ኣንስትዮ፡ ግዳያት ጎነጻዊ ገበናት ምንባረን ዝተፈላለያ ማሕበራት ደቂ ኣንስትዮ ይሕብራ።
ተርእዮታት ጎነጻዊ ገበናት፡ ኣብተን ብሰንኪ ቅልውላው ኮሮና ናይ ምውሻብ ስጉምቲ ዝወሰዳ ሃገራት፡ እናዛየደ ምምጽኡ ኣህጉራውያን ጸብጻባት ምሕባረን ይዝከር።
ኣብ መብዛሕትአን ከተማታት ሽወደን ተዶኲነን ዝርከባ “ኣባይቲ ምክልኻል ደቂ ኣንስትዮ”፡ ነተን ካብ ዝተፈላለዩ ኣባላት ስድራቤተን ጎነጽ ዘጋጥመን ደቂ ኣንስትዮ ሓገዛት ዝህብ ኣካል እዮ።
