ኣብ ሆቴል ዝደቀሱ ኣጋይሽ፡ ክልተ ዓርውቲ ሒዞም ተሰዊሮም

ብሰሉስ፡ ኣብ ሓደ ኣብ ኡስተሾንድ (Östersund) ዝርከብ ሆቴል፡ መደቀሲ ክፍሊ ዝሓዙ ክልተ ኣጋይሽ፡ ዋጋ መደቀሲኦም ከይከፈሉ ሃዲሞም ጥራይ ከይኣክል፡ ክልተ ዓበይቲ ዓራውቲ፡ ክልተ ተሌቪዥንን ሓንቲ ናይ ኤሌክትሪክ መጽረይን (vacuum cleaner) ሰሪቖም ከምዝተሰወሩ ጋዜጣ ኡስተሾንድ ፖስተን ኣብ ዓምድታቱ ኣስፊሩ ክብል ማዕከን ዜና ተተ ሓቢሩ።

እቲ ሆቴል፡ ነዞም ክልተ ኣጋይሽ፡ ናብቲ ሆቴል ኣብ ዝኣተውሉ ግዜ እኹል ምርግጋጽ ብዘይምግባሩን፡ ብተወሳኺ ድማ፡ ኣብ ግዜ ለይቲ ሓለዋ ብዘይምህላዉን ነቲ ናይ ስርቂ ፍጻሜ ከምዘቃለሎ ይእመን።

ህላውነት ናይቶም ኣጋይሽን ናይቲ ንብረት ምስዋርን፡ ሓሙስ ኣብ እዋን ምሳሕ ከምዝተፈልጠን ዝገለጸ ፖሊስ’ቲ ከባቢ፡ ዝኾነ ነዚ ጉዳይ ዝምልከት፡ ሓበሬታ ዘለዎ ሰብ፡ ክተሓጋገዝ ጸዊዑ ኣሎ።