ሰልፊ ስቬርያ ዲሞክራት ንሓደ ኣብ ምምሕዳር ቦትሺርካ ዝርከብ ፖለቲከኛ ኣባሉ ካብ መዝነቱ ከምዝኣለዮ ሓቢሩ። ሰልፊ ስቬርያ፡ እቲ ፖለቲከኛ ነቶም ኣንጻር ዓሌትነት ሰለማዊ ሰልፊ ዘካይዱ ዘለዉ ጸለምቲ “ኣህባይ” ኢሉ ድሕሪ ምጽዋዑ፡ ነቲ ስጉምቲ ከምዝወሰዶ ሬድዮ ሽወደን ሓቢሩ።
እቲ ፖለቲከኛ ነዚ ዓይነት መጸውዒ ዝተጠቀመ ኣብ ዕጹው ናይ ፌስ ቡክ ግሩፕ ምዃኑ ተፈሊጡ ኣሎ።
እቲ ዝተገብረ ቅቡል ዘይምዃኑን ሰልፊ ስቬርያ ድማ ነቲ ጉዳይ የጻርዮ ከምዘሎን ኣብቲ ምምሕዳር ወኪል ሰልፊ ስቬርያ ዝኾነ ማርቲን ኢንጅሎት ሓቢሩ።
ሰልፊ ስቬርያ ኣብ ልዕሊ እቲ ፖለቲከኛ ዝወሰዶ ካብ መዝነቱ ናይ ምእላይ ስጉምቲ ብምሉእ ልቢ ከም ዝተቐበለቶ ሓላፊት ኮሚቴ እቲ ምምሕዳርን ኣባል ሰልፊ ሶሻል ዲሞክራት ዝኾነት ኢባ ኦስትሊን ሓቢራ።
