ኣባላት ናይታ ኣብ ደቡብ ስቶክሆልም ከባቢ ቮርቦሪ፡ እትርከብ ገበናዊት መርበብ፡ ክኾኑ ይኽእሉ እዮም ተባሂሉ ዝንገረሎም 12 ሰባት፡ ናብ ፍርዲ ቀሪቦም ኣለዉ ክብል ሬድዮ ሽወደን ሓቢሩ።
ኣኽባሪ ሕጊ፡ ነዛ ገበናዊት መርበብ፡ ብገበናት መሸጣ ዕጸ-ፋርስን ብንግዲ ደቂ ሰባትን ክሲ ኣቕሪቡላ ከምዘሎ ተፈሊጡ ኣሎ። ሓላቓ ናይዛ መርበብ ምዃኑ ዝንገረሉ ወዲ 27 ዓመት መንእሰይ በዞም ገበናት እንተ ተኸሰሰ፡ ንሱ ግን ነዚ ክሲ ከምዘይቅበሎ ገሊጹ ኣሎ።
እዚ መንእሰይ፡ ንትሕቲ 17 ዓመት ዝኾኑ ቆልዑ ብምዕስካር፡ ዕጸ-ፋርስ ንኽሸጡ ይግድዶም ነይሩ ክብል ኣኽባሪ ሕጊ ክሱ ኣቕሪቡ ኣሎ።
እዛ ገበናዊት መርበብ፡ ሓሽሽን ኮካይንን ዝእመሰሉ ዕጸ-ፋርስ፡ ኣብ ቮርቦሪን ካልኦት ከባቢታት ስቶክሆሎምን ብስሩዕ ኣገባብ ንነዊሕ እዋን ትሸይጥ ብምንባራ፡ ነቲ ገበን ከኽብዶ ከምዝኽእል ኣኽባሪ ሕጊ ወሲኹ ገሊጹ።
