ኣመሪካ፡ መርመራ ጀሆ፡ ይቕጽል ኣሎ

ከም ኣካል ናይቲ ብቕድሚ ትማሊ ቀዳም ኣብ ቴክሳስ ኣብ ልዕሊ ቤተ መቕደስ ኣይሁድ እተኸስተ ናይ ጀሆ ምሓዝ ኣጋጣሚ፡ ዝካየድ ዘሎ መርመራ ኣብ ዓዲ እንግሊዝ ክልተ መንእሰያት ኣብ ትሕቲ ቀይዲ ውዒሎም ኣለዉ።

44 ዝዕድሜኡን ዜግነት ብሪጣንያ ዘለዎ፡ ማሊክ ፈይሰል ኣክረም፡ ከኣ ምስ ፖሊስ ድሕሪ ዝተኻየደ ልውውጥ ተዂሲ ኣብ ኮሊቭል ከም እተቐትለ ተገሊጹ።

ዝርዘር ዕድመን ጾታን ናይቶም ትማል ምሸት ኣብ ደቡብ ማንቸስተር ኣብ ትሕቲ ቀይዲ ዝኣተዉ ጽምዲ ገና ኣይተቓልዐን ኣሎ።

ፖሊስ ግሬተር ማንቸስተር ብወገኖም ምስ ነበርቲ እቲ ከባቢ ብምትሕብባር ነቲ ኣመሪካ እትገብሮ ዘላ መርመራ ኣብ ምስላጥ ከም ዝርከቡ ገሊጾም ኣለዉ።

እዞም መንእሰያት፡ ኣብ ትሕቲ ቀይዲ ዝኣተዉሉ ምኽንያት ኣካል ናይቲ ዝግበር ዘሎ መርመራ ምዃኑን መርመራ ይካየደሎም ምህላዉን እቲ ሓይሊ ወሲኹ ገሊጹ’ሎ።

ብመሰረት ምንጪታት ፖሊስ ኣመሪካ፡ ኣክረም፡ ቅድሚ ክልተ ሳምንታት እዩ ብመዓርፎ ነፈርቲ JFK ኒዮርክ ኣቢሉ ናብታ ሃገር ኣትዩ።

ሓው ኣክረም፡ ኣብ መርበብ ሓበሬታ ሙስሊም ብላክበርን ኣብ ዝለጠፎ ሓበሬታ፡ ኣክረም፡ ናይ ኣእምሮ ሕሙም ምንባሩ ድሕሪ ምግላጽ፡ ንስድራቤት ግዳያት በቲ ዝተፈጸመ ዘሕዝን ኲነታት ይቕሬታ ሓቲቱ’ሎ።