ኣመሪካን ብሪጣያን ብጒዳይ ትግራይ ናይ ህጹጽ እዋን ኣኼባ ባይቶ ጸጥታ ክግበር ጸዊዐን

ኣመሪካ፥ ብሪጣንያን ኣየርላንድን ንትግራይ ዛዕባ ዝገበረ ህጹጽ ጒባኤ ባይቶ ጸጥታ ክግበር ጻውዒት ምቕራበን AFP ሓቢራ።

እዚ ኣኼባ ዝመጽእ ዓርቢ ክካይድ እዩ ተባሂሉ’ሎ።

መንግስቲ ትግራይ ብሓይልታት ፈደራል ድሕሪ ምእላዩ ሰራዊት ትግራይ ንሸሞንተ ኣዋርሕ ድሕሪ ዘካየዶ ኲናት ትማል ሰኑይ ብዓወት ናብ ከተማ መቐለ ምእታዉ ማዕከናት ዜና ዓለም ይጽብጽባ ኣለዋ። እዚ ኣኼባ ባይቶ ጸጥታ ዝጽዋዕ ዘሎ እዚ ወሳኒ ፍጻመ ድሕሪ ምኽሳቱ ምዃኑ እቲ ዜና ወሲኹ ኣመልኪቱ።

ኣሽሓት ነበርቲ ከተማ መቐለ ኣብ ጎደናታት ወጺኡ ባንዴራ ትግራይ ብምንብልባል፥ ርችት ብምትኳስን ብዕልልታን ጨፈራን ሓጎሱ ይገልጹ ኣለዉ።

መንግስቲ ኢትዮጵያ በይናዊ ምቊራጽ ተዂሲ ኣዊጁ’ሎ። ዋና ጸሓፊ UN ኣንቶንዮ ጉተረዝ ምስ ቀዳማይ ሚኒስተር ኣብይ ኣሕመድ ምዝርራቡን ምቊራጽ ተጻብኦታት ክኽሰት ተስፋ ከም ዘለዎን ገሊጹ’ሎ።

ኣብ ትግራይ ኣብ መንጐ ሓይልታት ትግራይን መንግስቲ ፌደራልን መሻርክቱን ክግበር ብዝጸንሐ ኲናት ኣብ ልዕሊ ህዝቢ ትግራይ ኣዝዩ ከቢድ ሰብኣዊ ቅልውላው ምኽሳቱ ጸብጻባት የመልክቱ።