ንኣረጋውያን ዝኸውን ሓድሽ መድሃኒት ክታበት፡ ጸረ ወቕታዊ ሰዓል፡ ተረኺቡ

በዓል መዚ ኣሃዱ ጥዕና ሽወደን፡ ንፈለማ ግዜ፡ ንልዕሊ 65 ዓመት ዝዕድሚኦም ኣረጋውያን፡ ሓድሽ ጸረ ወቕታዊ ሰዓል (säsongsinfluensa) ዝኾነ ክታበት ክህብ ወሲኑ ምህላዉ ሬድዮ ሽወደን ኣቃሊሑ።

ክታበት ወቕቲ ቀውዒ ኣብ ዝጅምረሉ እዋን፡ ማለት፡ ኣብ ወርሒ ሕዳር፡ እዚ ሓድሽ ጸረ ወቕታዊ ሰዓል ዝኾነ ክታበት ንኣረጋውያን ክወሃብ ክጅምር እዩ። ምምሕዳራት ስኮና፡ ስቶክሆልም፡ ሶርምላንድን ያቭሊቦሪን ካብዚ ክታበት ንኽወሃበን ሓቲተን ምህላወን ተፈሊጡ ኣሎ። እዚ ሓድሽ ክታበት፡ ንኣረጋውያን ዝበለጸ መከላኸሊ ክኾኖም ትጽቢት ተገይርሉ ይርከብ።

ኣብ ዝመጽእ ዓመት፡ መጠን ብዝሒ ዝሞቱን ናብ ሆስፒታላት ዝኣትዉን ኣረጋውያን ንምጉዳል፡ ብሕማም ሰዓል ንኸይጥቅዑ ከነውሕስ ይግባኣና ክብል ኣብ ምምሕዳር ሶርምላንድ ሓላፊ ምክልኻል ለበዳ ዝኾነ ሲግናር ሚኪታሎ ሓቢሩ።

ዋጋ ናይዚ መድሃኒት ካብቲ ቅድሚ ሕጂ ዝነበረ ዝኸብር ምዃኑ ድማ ተሓቢሩ።