ናሚብያውያን ኣትሌታት: ካብ ውድድራት ኦሊምፒክ ክእገዳ እየን

18 ዝዕድሜኣ ናሚብያዊት: ክሪስቲን ምቦማ: ካብ ኦሊምፒክስ ከም ትሰናበት ተጌራ ተባሂሉ።

ዝተሰናበተትሉ ምክንያት ድማ: ካብቲ ብ World Athletics ዝተወሰነ መጠን ተስተስትሮን ዝልዕል ነዝዒ ኣብ ኣካላታ ስለ እተረኽበ እዩ ተባሂሉ’ሎ። ምቦማ: ነቲ ን30 ዓመታት ተታሒዙ ዝነበረ ክብረ ወሰን ጒያ 400 ሜትሮ ዝሰበረት ኣትሌት እያ። እዛ ብረቡዕ ኣብ ፖላንዳዊት ከተማ ቢድጎሽች: ኣብ ዝተኻየደ ቅድድም: ነዚ ክብረ ወሰን ዝጨበጠት ኣትሌት ኣብቲ ኣብ ቶክዮ ዝካየድ ውድድር ንወርቂ ማዳልያ ተሓርያ ምንባራ ተፈሊጡ። እንተኾነ ግን፡ ናሚባውያን ተወዳደርቲ ዝኾና ምቦማን ዘላሊት ማሲሊንጊን ልዕል ዝበለ መጠን ነዝዒ ተስተስትሮን ኣብ ኣካላተን ስለ ዘለወን ካብ ውድድር ክእገዳ ምዃነን ኮሚተ ኦሊምፒክ ኣፍሊጡ’ሎ።

ክልቲኣተን ኣትሌታት: ስድራቤተን ይኹን ኣሰልጣኒአን ብዛዕባ ኣዚ ኲነታት ዝፈልጥዎ ነገር ኣይነበሮምን ክብል ኮሚተ ኦሊምፒክስ ናሚብያ ገሊጹ’ሎ።