ኣብ ፊልምታት ሃሪ ፖተር ከምኡውን ፒኪ ብላይንደርስ ብምውሳእ እትፍለጥ ሄልን ማክክሮሪ ኣብ መበል 52 ዓመታ ብሕማም ካንሰር ምሟታ ተገሊጹ። ዜና ዕረፍታ ብበዓል ቤታ ደምያን ልዊስ ኣቢሉ ከም እትነግረ ድማ ቢቢሲ ሓቢራ”ላ።
ንሱ በዓልቤተይ ምጭውትን በዓልቲ ዘይሕለል ጸዓትን ምንጪ ዓብዪ ብርሃን እያ ኔራ፥ ብሰላም ዕረፊ ፍትውተይ፥ ምስጋናይ ወሰን የብሉን ክብል ብሞታ ከቢድ ሓዘን ከም እተሰምዖ ገሊጹ’ሎ።
ደራሲት ዛንታታት ሃሪ ፖተር ዝኾነት ጄ ኬ ሮሊንግስ ብወገና “እዚ ልብኻ ዝሰብር ዜና እዩ” ኢላ’ላ።
ማክክሮሪ ብዘይካ ኣብዘን ፊልምታት ዝነበራ ተራ ኣብ ናይ መድረኽ ተዋስኦ እውን ናይ ሓያሎ ዓመታት ልምዲ ዝነበራ በዓልቲ ሞያ እያ። ኣካያዲ ሃገራዊ ትያትር ሩፉስ ኖሪስ “ብዘይጥርጥር ሓንቲ ካብ ዝዓበያ ተዋሳእቲ እዚ ወለዶ ኢና ስኢንና” ክብል ሓዘኑ ገሊጹ’ሎ።
ደራሲ ፒኪ ብላይንደርስ ስቲቨን ናይት ሞት ሄልን ድሕሪ ምስማዑ “ሓንቲ ካብ ዝዓበያ ተዋሳእቲ ዘመንና እያ ኔራ-ሓያልን ውድብትን ሰብ ኢና ከሲርና፥ ብሓቂ ልቢ ዝሰብር ዜና” ክብል ናይ ትዊተር መልእኽቱ ሰዲዱ”ሎ።
