ቀዳማይ ሚኒስተር ብሪጣንያ፡ ቦሪስ ጃንሰን፡ ንሕጽይቱ ካሪ ሲማንድስ፡ ብስቱር ኣብ ዝተኻየደ ጽንብል ኣብ ዌስትሚኒስተር ካቴድራል ምምርዓዉ ቢቢሲ ሓቢራ።
ኣብቲ ትማሊ ቐዳም ዝተኻየደ ጽንብል መርዓ፡ ናይ ቀረባ መሓዙትን ስድራቤትን ከም እተረኽቡ፡ ዝተፈላለያ ጋዜጣታት ሓቢረን። ካብ 30 ዘይበዝሑ ኣጋይሽ ብሓጺር ዕድመ ከም ዝቐረቡ ዝሓበረ እቲ ዜና፡ እዚ ብምኽንያት ምኽባር ሕግታት ኮቪድ ክኸውን ከም ዝኽእል ወሲኹ ገሊጹ’ሎ።
ኣብ ዝቕጽል ወርሒ ክራማት ድማ ምስ ኩሎም ቀረብቱን ቤተ ሰቡን ኮይኑ፡ ነዚ ናይ መርዓ ጽምብል ከምእንደገና ከብዕሎ ምኻኑ፡ ጆንሶን፡ ሓቢሩ።
ቦሪስ ጆንሶን፡ ኣብ ዝሓለፉ ክልተ ክፍለ ዘመናት ካብ ዝነበሩ ቀዳሞት ሚኒስተራት፡ እቲ ቀዳማይ ኣብዚ መዝነት እንከሎ ዝተመርዓወ ቀዳማይ ሚኒስተር ኮይኑ ከምዘሎ ተንተንቲ ፖለቲካ ይሕብሩ።
