ቤላሩሳዊት ተወዳዳሪት ኦሊምፒክ፡ ኣብ ኤምባሲ ፖላንድ ዕቚባ ሓቲታ

ቤላሩስያዊት ናይ ምንጣር ኣትለት፡ ክሪስቲና ቲማኖቭስካያ፡ ንውድድር ኦሊምፒክስ ድሕሪ ምኻዳ ኣብ ኤምባሲ ፖላንድ ዕቚባ ምሕታታ ኣክቲቪስት እታ ሃገር ሓቢሮም።

ክሪስቲና፡ ንኣሰልጠንተይ ስለ ዝነቐፍኩ እየ ናብ ኤርፖርት ብግዲ ዝውሰደ ዘለኹ፡ ኣብ ሃገረይ ጸጥታዊ ውሕስነት የብለይን ብምባል ኣብ ዝነበረቶ ሆቴል ሓለዋ ፖሊስ ጃፓን ክግበረላ ምሕታታ ጸብጻብ ቢቢሲ ኣመልኪቱ።

ሰብመዚ ቤላሩስ፡ ብወገኖም እታ ተወዳዳሪት ስምዒታ ኣብ ጽቡቕ ኲነታት ስለ ዘይነበረ ካብ ጸወታ ወጻኢ ክትከውን ከም እተገብረት ገሊጾም ኣለዉ።

24 ዝዕድሜኣ ክሪስቲና ድሕሪ’ቲ ሓለዋ፡ ናብ ኤምባሲ ፖላንድ ክትኣቱ ከም እተራእየትን ንኣትሌታት ቤላሩስ ዝሕለቕ ሓደ ጒጅለ፡ እታ ኣትሌት ኣብ ፖላንድ ፖለቲካዊ ዕቚባ ትሓትት ምህላው ምሕባሩ እቲ ጸብጻብ ወሲኹ ገሊጹ።