ብመሰረት ዕዳ ዝእክብ ኩባንያ ቾኖፎግደን (Kronofogden) ዘውጸኦ ሓበሬታዊ ስሌዳ፡ ቁጽሪ ናይቶም ኣብ መዝገብ ናይቲ ኩባንያ ተዘርዚሮም ዘለዉ ከፈልቲ ዕዳ ዝኾኑ ሰባት ንራብዓይ ዓመት ብተኽታታሊ ከም ዝቐነሰ ተሓቢሩ። ኣብ መጨረሽታ ናይ ዓመተ 2019፡ ቁጽሪ ናይቶም በዚ ኩባንያ ዝተዓድዩ ሰባት ብ16751 ብምጉዳሉ እቲ ቁጽሪ ናብ 397161 ወሪዱ።
ኣብ 2018 በቲ ኩባንያ ክእከብ ዝነበሮ መጠን ገንዘብ 81.5 ቢልዮን ክሮነር ነይሩ። ኣብ 2019 እቲ መጠን ናብ 82.7 ቢልዮን ክሮነር ክብ ክብል ከምዝኸኣለ እቲ ኩባንያ ኣፍሊጡ። እቲ ምኽንያት ክገልጽ እንከሎ እቲ ኩባንያ ከምዚ ይብል፡ ቁጽሪ ከፈልቲ ዕዳ ብምጉዳሉ እቲ ክኽፈል ዝግበኦ ዝነበረ ዕዳ ወለዱ እናዛየደ ብምኻዱ እቲ ገንዘባዊ መጠን ከምዝወሰኸ ገሊጹ። ካብቶም ሰብ ዕዳ እቶም 67% ደቂ ተባዕትዮ ምዃኖም ውን እቲ ጸብጻብ ብተወሳኺ ሓቢሩ።
