ስዑዲ ዓረብ፡ ንዝተኸትቡ ገያሾ ማዕጾኣ ትኸፍት

ስዑዲ ዓረብ፡ ን17 ኣዋርሕ ተዓጽያ ድሕሪ ምጽናሕ፡ ዝተኸትቡ ናይ ወጻኢ በጻሕቲ ክኣትዉ ምፍቃዳ ኣገልግሎት ዜና መንግስቲ ሓቢሩ ክብል ማዕከን ዜና ተተ ገሊጹ።

ኣብ ስዑዲ ዓረብ ኣቲኻ ብዘይ ውሸባ ናብ ዝደለኻዮ ንኽትከይድ በተን መንግስቲ እታ ሃገር ሕጋዊ ፍቓድ ዝሃበን ክታበታት ማለት ፋይዘር ባዮቴክ፡ ኣስትራዜነካ፡ ሞደርና ወይ ጃንሰን ከም እተኸተብካ ምርግጋጽ ከድሊ እዩ ተባሂሉ’ሎ።

ብዘይካ’ዚ፡ እዞም በጻሕቲ ቅድሚ 72 ሰዓታት ካብ ሕማም ኮሮና ናጻ (ነጋቲቭ) ምዃኖም ዘርጋግጽ ምስክር ወረቐት የድልዮም እዩ ክብል እቲ ኣገልግሎት ዜና ወሲኹ ሓቢሩ።

ቅድሚ ምስፍሕፋሕ ኮሮና፡ ስዑዲ ዓረብ፡ ሕጊ ኢሚግሬሽን እታ ሃገር ብምፍኳስ፡ በጻሕቲ ክትስሕብ ትጽዕር ምንባራ ዝፍለጥ እዩ። ካብ መስከረም 2019 ክሳብ መጋቢት 2020 ኣብ ዝነበረ ግዜ፡ ስዑዲ ዓረብ፡ ን ልዕሊ 400 ሽሕ በጻሕቲ ቪዛ ምሃባ ጸብጻባት የመልክቱ።