ስራሕ ኣልቦ ዝኾኑ ሰባት፡ ክሳብ ናይ ሓደ ዓመት ዝኣክል ረብሓታት እንዳ ረኸቡ ክመሃሩ ክኽእሉ እዮም። ንኣብነት ናይ ካልኣይ ደረጃ ትምህርቲ ንምዝዛም። ቤት ጽሕፈት ዕዮ ሽወደን፡ ነቶም ስራሕ ኣልቦ ዝኾኑ ሰባት፡ ኣብ ክንዲ ናብ ሞያዊ፡ ናብ ስሩዕ ኣካዳምያዊ ትምህርቲ ንኽኸዱ ክመርሖም ሓላፍነት ተዋሂብዎ ኣሎ።
ቤት ጽሕፈት ዕዮ ሽወደን፡ ዝያዳ ዕድላት ትምህርቲ፡ ንስራሕ ኣልቦ ዝኾኑ ሰባት ይፈጥር ኣሎ ክትብል ሚኒስተር ዕዮ ሽወደን፡ ኢቫ ኖርድማርክ፡ ኣብቲ ሚኒስተር ትምህርቲ ሽወደን፡ ኣና ኤክስትሮም፡ ዝተረኽበትሉ ጋዜጣዊ መግለጺ ሓቢራ።
መንግስቲ ሽወደን፡ ንዕዳጋታት ስራሕ ዝምልከት ተወሰኽቲ ፖሊሲታትን ስልጠናታትን ከምዘድሊ ኣሚንሉ ኣሎ ክትብል፡ ኢቫ፡ ወሲኻ ገሊጻ።
ሓደ ሲሶ ካብቶም ምዝጉባት ስራሕ ኣልቦ ዝኾኑ ሰባት፡ ናይ ካልኣይ ደረጃ ትምህርቶም ዘይዛዘሙ እዮም። ኣብ ዕዳጋታት ስራሕ፡ ስራሕ ንኽትረክብ፡ ልዕሊ ናይ ካልኣይ ደረጃ ትምህርቲ፡ ክህልውካ ብጣዕሚ ኣገዳሲ እዩ ክትብል፡ ኢቫ፡ ዘረባኣ ዛዚማ።
