ምክትል ፕረዚደንት ዚምባብዌ፡ ብሰንኪ ክሲ ጾታዊ ቅለት፡ ስልጣኑ ይሓድግ

ምክትል ፕረዚደንት ሃገረ ዙምባብዌ፡ ኬምቦ ሞሃዲ፡ ዝቐረበሉ ክሲ ጾታዊ ቅለት ንሰሙን ዝኣክል ክኽሕድ ድሕሪ ምጽናሕ ስልጣኑ ብፍቓዱ ሓዲጉ’ሎ ክትብል ቢቢሲ ሓቢራ።

71 ዝዕድሜኡ፡ ሞሃዲ፡ ብናይ ድምጺ ምምስሳል፡ ግዳይ ዓሎቕ ኮይነ ኣለኹ ብምባል ንገዛእ ርእሱ ምክልኻል ምቕጻሉ ተገሊጹ።

ሓንቲ ዲጂታላዊት ጋዜጣ፡ ምስ ዝተፈላለያ ደቀንስትዮ እንተላይ ንሱ ዝእዝዘን መሳርሕቱ ጽዩፍ ናይ ተሌፎን ዕላላት እናኣካየደ ብድምጺ ኣሰንያ ኣቕሪባ’ላ።

ንሱ ደጋጊሙ፡ ግዳይ ምዝንባዕ ሓበሬታን ፖለቲካዊ ምክልባትን እየ፡ ክብል ናብ ሚኒስትሪ ዜና እታ ሃገር ኣብ ዝለኣኾ ናይ ስንብት ደብዳቤ ሓቢሩ።

ናብ ውሻጠ መንፈሰይ ጥልቕ ኢለ ምስ ሽግራተይ ዝዝትየሉ ግዜን ዕረፍትን የድልየኒ ኣሎ፡ ክብል ምኽንያት ናይ ስንብቱ ኣብሪሁ’ሎ።

ንሱ፡ ምስንባቱ ፍርሂ ከም ዘይኮነ ብኣንጻሩ ንዕኡ ብምውራድ፡ ንቤት ጽሕፈት ፕረዚደንት ከናሽዉ ዝደልዩ ብምህላዎም፡ ንኽብሪ እቲ ቤት ጽሕፈት ክብል ነቲ ውሳነ ከምዝወሰዶ ኣብቲ ደብዳቤኡ ገሊጹ።