ምምሕዳር ኡፕሳላ፡ ንኹሉ ክፋል ሕብረተሰብ፡ ክታበት ሞደርና ክኸትብ ወሲኑ

ፍርያት ኩባንያ ሞደርና ዝኾነ ክታበት ክትኽተብ ትደሊ ዶ፧ ካብ ሎሚ ንደሓር፡ ኣብ ዝኾነ ክፋል ናይ ሽወደን ወላ ንበር፡ ናብ ምምሕዳር ኡፕሳላ ብምምጻእ፡ ፍርያት ሞደርና ዝኾነ ክታበት ኮቪድ-19  ክትኽተብ ከምእትኽእል፡ እቲ ምምሕዳር ሓቢሩ ክብል ማዕከን ዜና ተተ ኣቃሊሑ ኣሎ።

መሰረት ናይዚ ውሳኔ፡ ኣብ ምምሕዳርና ተረፍ ብልቃጥ ክታበት ስለዘሎን ክንግሕፎ ስለ ዘይንደልን ብተወሳኺ ድማ፡ 5000 ናይ ክታበት ግዜ ስለዘለና እዩ ክብል ኣብ ምምሕዳር ኡፕሳላ፡ ሓላፊ ፍርያት ዝኾነ፡ ኤሪክ ኾልዲየንቤሪ፡ ኣብ ዝሃቦ ጋዜጣዊ መግለጺ ሓቢሩ።

ነዚ ተመዲቡ ዘሎ ክታበት ንምውሳድ፡ ብመንገዲ 1177.se ቆጸራ ብምሓዝ፡ ኣብ ስቲየንሃገን (Stenhagen) ኡፕሳላ ኮንሰርትን ኮንግረስን (uppsala concert and congress) ብምምጻእ፡ ክታበት ክውሰድ ይከኣል።

ምምሕዳር ኡፕሳላ፡ ብነበርቲ እቲ ምምሕዳር ዓቢ ተጠላብነት ዘለዎ ክታበት ፋይዘር እኳ እንተሃለዎ፡ እኹል ብዘይ ምዃኑ፡ ንኻልኦት ክወሃብ ኣይክኽእልን እዩ።

ክታበት ሞደርና፡ ንትሕቲ 18 ዓመት ዝኾኑ መንእሰያት ንምኽታብ፡ ጌና፡ ፍቓድ ከምዘይረኸበ ይዝከር።