ምምላኽ ቋንቋ ሸወደን ስራሕ ንምርካብ ምውህሃድን ወሳኒ ረቛሒ እዩ ተባሂሉ።

መራሒ ሰልፊ ሞደራትና ኡልፍ ክሪስተርሾን፡ ምስፍሕፋሕ ገበንን ምውህሃድን ከም ኣርእስቲ መሪጹ ኣብቲ ፖለቲከኛታት፡ ከምኡውን ተጣበቕቲ ጒጅለታት፡ ኣብ ወሰን ሰሜናዊ ምዕራብ ስቶክሆልም ገጽ ንገጽ ዝራኸባሉ ዓመታዊ ቅነ ፖለቲካ ያርቫቬካን መደረ ምስምዑ፡ ሬድዮ ሽወደን ጸብጺባ። ንሱ ቋንቋ ሽወደን ብንእሽቶኻ ምምሃር፡ ኣዝዩ ወሳኒ ረቛሒ ምዃኑ ኣስሚሩሉ’ሎ። ካብ መንግስቲ ዝወሃብ ሓገዝ ንስራሕ ክትክእ ኣይክእልን እዩ ክብል ድማ ብኣጽንኦት ኣመልኪቱ። ምክልኻል ገበን፡ ኣዝዩ ኣገዳሲ ዕዮ ናይ ዝመጽእ ዓመታት እዩ ዝበለ ክሪስተርሰን፡ መንግስቲ ኣብዚ ጒዳይ ሒደት ጻዕርታት ጥራይ ብምግባሩ ወቒሱ’ሎ።