ትማሊ ሓሙስ ሰዓት 10 ቅ/ቀ፡ ማስክ ዝወደየን ኣብ ኢዱ ፋስ እናወጣወጠ ኣብ ቮርቦሪ ምዕራብ ሽወደን፡ እትርከብ ካልኣይ ደረጃ ቤት ትምህርቲ ስክሪቫረ፡ መጥቃዕቲ ምክያዱ ተገሊጹ። በዚ መጥቃዕቲ ሓደ ተመሃራይ ማህሰይቲ ከምዝወረዶ ተፈሊጡ ክብል ጋዜጣ ኣፍቶንብላዴት ሓቢሩ።
ምስዚ መጥቃዕቲ ምትእስሳር ኣለዎ ብዝብልን ኣብ ጥቓ እቲ ቤት ትምህርቲ ሓቂ ብምስዋርን ዝጠርጠሮ፡ ፖሊስ፡ ንሓደ ወዲ 25 ዓመት መእንሰይ ኣብ ትሕቲ ቀይዲ የእትይዎ ኣሎ። ብተወሳኺ፡ ፖሊስ፡ ኣብ ቀጽሪ እቲ ቤት ትምህርቲ ፋስ፡ ካራ፡ መሸፈን ርእስን ማስክን ከምዝረኸበ ገሊጹ። እቲ ጥርጡር ብፖሊስ ይፍለጥ እዩ ክብል ኣፈኛ ፖሊስ ምዕራባዊ ኣውራጃ ስቲፋን ጉስታፎን ገሊጹ። ኣብቲ ከባቢ ዝነበረ እንዳ ጓሕፍ ምስ ዝተሳወረ ሓዊ ምትእስሳር ከም ዘለዎ ውን ወሲኹ ሓቢሩ
እቲ መንእሰይ ንፖሊስ ዝነገሮም ኣብ ክልቲኡ ኣጋጣሚታት ተጠርጣሪ ከም ዝገብሮ ድማ ወሲኹ ኣብሪሁ።
ፖሊስ፡ መባእታዊ መርመራ ምግባሮምን ነዚ ተግባር ከም ፈተነ ቅትለትን ምስዋር ሓዊን ከም ዝርእይዎን ድማ ገሊጾም ኣለዉ። ፖሊስ፡ ነቲ ከባቢ ብምሕጻር፡ ንድርኺት እዚ መንእሰይ ኣብ ምምርማር ምህላዎም ድማ ተገሊጹ። እቲ ዝተሃስየ ተመሃራይ ናብ ሆስፒታል ብዛዕባ ምኻዱ ዝተረኽበ ሓበሬታ የለን።
