ማሕበር ተኻረይቲ: ሕጽረት ኣባይቲ ንዕድላትን ምርጫን ዜጋታት የጎናድብ ኣሎ።

ኣብ ሽወደን ዝረአ ዘሎ ሕጽረት ኣባይቲ፡ ተኻረይቲ ኣብ ህይወቶም ዝህልዎም ዕድላትን ምርጫታትን ክጎናደብ ይገብር ምህላዉ፡ ማሕበር ተኻረይቲ ገሊጹ።

ኣብ ከምዚ ዝበለ መደምደምታ ዝበጽሐ ኖቩስ፡ ንማሕበር ተኻረይቲ ሽወደን ኣመልኪቱ ኣብ ልዕሊ 4,000 ሰባት ድሕሪ ዘካየዶ መጽናዕቲ እዩ። “ብዙሓት ሰባት፡ ብምኽንያት ሕጽረት ኣባይቲ ህይወቶም ክድረት ተጌሩ’ሎ። “ካብዚኣቶም እቶም ሓደ ርብዒ ብምኽንያት እዚ ሽግር ስራሕ ንምድላይ ክንቀሳቐሱ ወይ ክመሃሩ ከም ዘይከኣሉ እዮም ዝሕብሩ” ክብል ኣብ ማሕበር ተኻረይቲ ሽወደን ዋና ክኢላ ቊጠባዊ ጒዳያት ማርቲን ሆቨርበርግ ንሬድዮ ሽወደን ገሊጹ’ሎ።