ትማሊ ሰንበት ኣብ ከባቢ ሰዓት ሓሙሽተ ድሕሪ ቀትሪ፡ ኣብ ማእከል ማልሞ፡ ሰለስተ ሰባት ኣብ ዝተፈላለየ እዋን፡ ናይ ካራ መጥቃዕቲ ከምዝወረዶምን ብኣምቡላንስ ድማ ንሆስፒታል ከምዝተወስዱን ተሓቢሩ።
ኣብ ልዕሊ እዞም ሰለስተ ሰባት ዝወረደ ገበን፡ ብሰንኪ ቑጠዐ ዝተፈጸመ መጥቃዕቲ ክኸውን ከምዝኽእል ወሃብ ቃል ደቡባዊ ኣከባቢ፡ ጂሚ ሞዲን፡ ገሊጹ።
እቶም ግዳያት ክሳብ ክንደይ ከምተሃስዩ ንጹር ሓበሬታ እኳ እንተዘይተረኽበ፡ እቲ ማህሰይቲ ተመሳሳሊ ብምዃኑ፡ ሓደ ሰብ ፈጺምዎ ክኸውን ከምዝኽእል፡ ፖሊስ፡ ጥርጣሬኡ ገሊጹ።
እቲ ኣጋጣሚ ኣብ ሞላን ዝበሃል ከባቢ እትርከብ ቤት መግቢ ዝተፈጸመ ኮይኑ፡ ብርክት ዝበሉ ሰባት ንሓደ ካራ ዝሓዘ ሰብኣይ ክሃርሙን ብኻራ ከጥቅዑን ከምዝረኣየ ሓደ ምስክር ንጋዜጣ ሲድስቨንስካን (Sydsvenskan) ሓቢሩ።
ኣብቲ ፍጻመ፡ ብርክት ዝበሉ ሰባት ተሳቲፎም ክኾኑ ከምዝኽእሉን ነቲ ፍጻመ ንምጽራይ መርመራታት ከምዝጀመረን ጂሚ ሞዲን ገሊጹ።
