መንገዲ ኣየር ኖርወጅያን ካብን ናብን ሽወደን ናይ በረራ ጉዕዞታታ ክትጅምር እያ

መንገዲ ኣየር ኖርወጅያን ካብ ዕለት 01/07/2020 ጀሚራ ካብን ናብን ሽወደን ዝነበረ ናይ በረራ ጉዕዞታት ክትጅምሮ ምዃና ሓቢራ።

ኣብ ውሽጢ ሽወደን ናብ 3 ቦታታት፡ ካብ ሽወደን ወጻኢ ድማ ናብ 10 ኣብ ውሽጢ ኤውሮፓ ዝርከብ ቦታታት ብድምር ናይ 76 በረራ ጉዕዞታታ ከተካይድ ምዃና እታ ኩባንያ ኣብ ዝሃበቶ ጋዜጣዊ መግለጺ ሓቢራ።

ኩባንያ ኖርወጅያን፡ ኣብ ግዜ ጉዕዞ ከጋጥሙ ዝኽእሉ ናይ ኮሮና ቫይረስ ለበዳ ንምግታእን ንምቁጽጻርን ዘኽእል ዝግባእ ቅድመ ምድላዋት ገይራ ከምዘላ ኣካያዲ ስራሕ’ታ ኩባንያ፡ ያኮብ ሽራም፡ ገሊጹ።

ብጥንቃቐን ብዘገምታን ናብ ንቡር ሂወትና ተመሊስና ኣካል ናይ ሕብረተሰብ ንኽንከውን ድልየት ኣለና ክብል ብተወሳኺ ገሊጹ።

ኩባንያ ኖርወጅያን፡ ብሰንኪ ቅልውላው ኮሮና ካብ ስራሕ ደው ኢሎም ዝጸንሑ 200 ኣብረርቲ ነፋሪትን 400 ኣባላት’ታ ኩባንያ ናብ ንቡር ስርሖም ክትመልስ ምዃና ሓቢራ ኣላ።