ኣብ ሽወደን፡ መልከፍቲ ኮቪድ እናወሰኸ ይኸይድ ከምዘሎ እኳ እንተተፈልጠ፡ መጠን ምስፍሕፋሕ ለበዳ ግን ብሰንኪ ዝተኻየደ ጽቡቕ ሸፈነ ክታበት፡ ምስ ናይ ዝሓለፈ እዋን ክነጻጸር እንከሎ፡ ዝተሓተ ከምዘሎን፡ ይኹን እምበር፡ ኣብ ሓድሽ ማዕበል ለበዳ ኮቪድ ከምዘለና ዝሕብሩ ምልክታት ግን ኣለዉ ክብል፡ ኣማኻሪ በዓል መዚ ህዝባዊ ጥዕና ሽወደን ኣብ ጉዳይ ተመሓላለፍቲ ሕማማት፡ ኣንደሽ ተግነል፡ ኣብ ዘካየዶ ጋዜጣዊ መግለጺ ሓቢሩ፡ ክብል ማዕከን ዜና ተተ ኣቃሊሑ።
ኣብ መላእ ዓለም፡ መጠን መልከፍቲ እናወሰኸ ይኸይድ እኳ እንተሃለወ፡ ኣብ ኤውሮጳ ግን ብጻዕቂ ይረአ ከምዘሎ ዝሓበረ ተግነል፡ እዚ ግን፡ ሓድሽ ተርእዮ ከምዘይኮነን፡ ከምቶም ዝሓለፉ ሓደስቲ ማዕበል ለበዳታት፡ ዘጋጥመ ተርእዮታት ምዃኑ ኣዘኻኺሩ።
ኣብ ሽወደን፡ ዝረአ ዘሎ ምዕባለታት ሓድሽ ማዕበል ለበዳ፡ ምስ ኤውሮጳ ክወዳደር እንከሎ፡ ዝተሕተ ምዃኑ እኳ እንተተገልጸ፡ ኣብ ዝሓለፈ እዋናት ማዕበል ለበዳ ግን፡ ሽወደን፡ ቁሩብ ድሕር ኢላ ከምዝነበረት ይዝከር ክብል ተግነል ገሊጹ።
