ልዕሊ ሓደ ሽሕ ስደተኛታት: ናብ ደሴት ኢጣልያ: ላምፔዱሳ: ኣትዮም

ትማሊ ሰንበት: ኣብ ናይ ሰዓታት ፍልልይ ሓደ ሽሕ ዝኾኑ ስደተኛታት ከም ዝኣተዉ: ጸብጻባት ውሽጣዊ ሚድያ ዓዲ ጥልያን ገሊጾም።

ሓንቲ ጃልባ ጥራይ ክሳብ 400 ሰብኡት: ደቀንስትዮን ቆልዑን ጽዒና ምንባራ: ኣንሳ ዝተባህለ: ኣገልግሎት ዜና ኢጣልያ ሓቢሩ። ካልኦት ጀላቡ እውን ኣብ ማልታ ከም እተራእያን ናይ ርድኡና ጥሩምባ ከም ዘስምዓን ተገሊጹ።

ከንቲባ እታ ደሴት: ቶቶ ማርቴሎ: ምምጻእ ስደተኛታት ምስ ጽቡቕ ኲነታት ኣየር ከም ዝሳነ ገሊጹ’ሎ።

ካብ ዝሓለፈ ዓመት ጥራይ: ክሳብ 11ሽሕ ዝኾኑ ስደተኛታት: ኣብዛ ደሴት ምብጽሖም ጸብጻብ ቢቢሲ ይሕብር።

ላምፔዱሳ: ናብ ኣውሮጳ ክኣትዉ ዝደልዩ ስደተኛታት: ዝሓልፉላ ደሴት ምዃና ይፍለጥ።