ሊዮኔል ሜሲ፡ ምስ PSG ፈሪሙ

ድሕሪ 23 ዓመታት፡ ሊዮኔል ሜሲ፡ ነታ እንኮ ዝተጻወተላ ጋንታ፡ ባርሴሎና፡ ገዲፉ ምስ ክለብ PSG ንኽልተ ዓመት ዘጽንሖ ውዕል ፈሪሙ ከምዘሎ ማዕከናት ዜና ዓለም ገሊጸን ኣለዋ።

ትማሊ ሰሉስ ናብ ከተማ ፓሪስ ዝኣተወ ሜሲ፡ ብኣሽሓት ዝቑጸሩ ደገፍቲ ጋንታ PSG ን ደገፍቲ ሜሲን ኣብቲ 17 ኪ.ሜ. ርሒቑ ኣብ ሰሜን ፓሪስ ዝርከብ መዕርፎ ነፈርቲ ንኽልተ መዓልታት ዝኣክል ክጽበይዎ ምጽንሖም ተሓቢሩ።

ሊዮኔል ሜሲ፡ ማልያ ቁጽሪ 30 ተኸዲኑ ኣብ ጎድኒ ናይ ቀደም ወዲ ጋንትኡ፡ ነይማርን ድንቂ ፈረንሳዊ ተጻዋታይ ኢምፓፐን ኮይኑ ምስ ጋንታ PSG ጸወትኡ ከሰላስል ምዃኑ ተፈሊጡ።

ኣብዚ ተጻወቲ ናይ ምስግጋር ወቕቲ፡ ጋንታ PSG፡ ንኢጣልያዊ ሓላው ልዳት፡ ዶናሩማ፡ ንሞሮካዊ ናይ ክንፊ ተኸላኻላይ፡ ሓኪሚ፡ ንሆላንዳዊ ናይ ማእከል ተጻዋታይ፡ ዋይናልዶምን ንሜሲን ከምዘፈረመት ይፍለጥ።