ሃገረ ሽወደን፡ ንዘይ ማዕበላ ሃገራት ዝኸውን፡ ሰለስተ ሚልዮን ብልቃጥ ክታበት፡ ሓገዝ ክትህብ ምኻና፡ ብመንገዲ ቀዳማይ ሚኒስተር’ታ ሃገር፡ ስቴፋን ሎቬን፡ ገሊጻ ክብል ማዕከን ዜና ተተ ኣቃሊሑ።
እቲ ሓገዝ፡ ብመንገዲ ዓለምለኻዊ ማዕከን ኮቫክስ ኣቢሉ፡ ናብተን ድኻታት ሃገራት ንኽበጽሕ ትጽቢት ይግበር።
ሃገረ ሽወደን፡ ልዕሊ እቲ ዘድልያ ብልቃጥ ክታበት ንምርካብ ውዕል ከምዝኣተወት ዝፍለጥ ኮይኑ፡ ንዜጋታታ ምኽታብ፡ ከም ቀዳምነት ሒዛ፡ ንዘይማዕበላ ሃገራት ዝኸውን ሓገዝ ክትህብ ምኻና፡ ስቴፋን ሎቬን፡ ሓቢሩ። እንተኾነ፡ እንታይነት ናይቲ ንሓገዝ ተባሂሉ ክወሃብ ተመዲቡ ዘሎ ክታበት ኮቪድ ግን ኣይገለጸን ክብል እቲ ጸብጻብ ሓቢሩ።
ሃገረ ሽወደን፡ ትማሊ ሰሉስ፡ ነዚ ሓገዝ ክትህብ ምኻና ዝገለጸት፡ ኣብቲ ኣብ ብራስለስ ዝካየድ ዘሎ ኣኼባ ሃገራት ኤውሮፓዊ ሕብረት ምኻኑ እቲ ጸብጻብ ብተወሳኺ ሓቢሩ።
