ሃለንግረን፡ “ሰላምታኹም፡ ምዉቕ ነይሩ”

ኣብ ዝሓለፈ ወርሒ ሚያዝያ፡ ሚኒስተር ማሕበራዊ ጉዳያት ሽወደን፡ ሌና ሃለንግረን፡ ናይ ጡብ መንሽሮ ከምዘለዋን ሕክምና ክትጅምር ምዃናን ገሊጻ ምንባራ ዝዝከር ኮይኑ፡ ኣብዚ ሕጂ እዋን ድማ፡ እቲ ሽዱሽተ ግዜ ዝካየድ ኪሞተራፒ ማለት፡ ቀዳማይ መድረኽ ናይቲ ሕክምና፡ ከም ዝዛዘመት ኣብ ውልቃዊ ሒሳብ ኢንስተግራም ገሊጻ ክብል ማዕከን ዜና ተተ ሓቢሩ።

ቀዳማይ መድረኽ ሕክምና ዛዚመ ናብቲ ኣርባዕተ ሰሙን ዝወስድ ናይ ጨረርታ (radiation) ሕክምና፡ ማለት፡ ካልኣይ መድረኽ ምስጋረይ፡ ብጣዕሚ ደስታ እናተሰማዓኒ ኣብዚ ሕጂ እዋን፡ ሳላ ዲጂታላዊ ኣገባብ፡ ካብ ገዛ ኮይነ፡ ከምቲ ልሙድ፡ ስረሐይ ከሰላስል እየ ክትብል ገሊጻ።

ካብ ኩሎም ወገናት ንዝመጻ ናይ መተባብዕን ጥዕናዊ ኩነታት ዝሓትት መልእኽታትን ኣመልኪታ ምስጋናኣ ብምቕራብ፡ ሰላምታኹም ምዉቕ ነይሩ ክትብል፡ ጽሑፋ ደምዲማ።