ማሕበር ሞያውያን መሃንድሳት ፊንላንድ (IL) ዩኒቨርሲቲታት ኣብ ተግባራዊ ሳይንስ ናይ ፕሮግርማታ ዲግሪ ዶክተርነት ክህባ ጻውዒት
ኣቕሪቦም። እቲ ማሕበር ኣብቲ ዘቕረቦ እማመ፡ ናብ ዩኒቨርሲቲታት መደባት ተግባራዊ ሳይንስ ብደረጃ ዲግሪ ዶክትሬት ምምጻእ፡
ነቲ ሃገራዊ ኣድላይነት ምዕዛዝ ወፍሪ፥ ምርምርን ምዕባለን ኣድላዪ ምላሽ ዝህብ እዩ ብምባል ሞጒቱ’ሎ። እዚ ምስ ኢንዱስትሪ
ብቐረባ ብምትሕብባር እንተተኻይዱ፡ እቲ ለውጢ ንኣፍራይነትን ተወዳዳርነትን ኢንዱስትሪ እውን ወሳኒ ተራ ክጻወት ምዃኑ ሓቢሩ።
“እዚ ኣብ ፊንላንድ ዝያዳ ተመራመርትን ናይ ምርምር ዓቕምን ንምፍጣር ዝበለጸ መገዲ ምኾነ ኔሩ” ዝበለ ከኣ ሓላፊ ምጉስጓስ
ኣብ IL ፔተሪ ኦክሳ እዩ። ኦክሳ፡ እቲ እማመ ብደረጃ ዩኒቨርሲቲ ኣብ ስርዓተ ትምህርቲ ማዕርነት ንምስፋን ዝሕግዝ መንገዲ
ምዃኑ’ውን ኣስሚሩሉ። ካብ ምህሮ ተግባራዊ ሳይንስ ናይ ድሕረ ምረቓ ዲግሪ ዘለዎም ሰባት ኣብዚ እዋን’ዚ ናብ ፕሮግራማት
ዶክትሬት ምእታው ኣብ ክፉት መመልከቲ ዘይኮነስ ብፕሮፌሰራት ኣብ ዝገብርዎ ምርጫ ስለዝተመርኮሰ ናይ ዶክትሬት ዲግሪ
ንምርካብ ይጽገሙ ከምዘለዉ ኣጉሊሑ።
“ኣብ ዝሓለፉ ዓሰርተ ዓመታት ኣብ ዓውድታት ቴክኒክ ልዕሊ 3,600 ዶክተራት ተፈሪዮም እዮም። ሸሞንተ ካብኣቶም ብናይ
ድሕረ ምረቓ ፕሮግራም ኣብ ዩኒቨርሲቲ ተግባራዊ ሳይንስ ነቲ ዲግሪ ከምዝወሰዱ እኣምን” ክብል ኦክሳ ገሊጹ’ሎ። ረክተር
ዩኒቨርሲቲ ተግባራዊ ሳይንስ ማእከላይ ኦስትሮቦትኒያ (ሴንትሪያ) ታፒዮ ሁቱላ፡ እቲ እማመ ኣብ መንጎ ዩኒቨርሲቲታት ተግባራዊ
ሳይንስን ኢንዱስትሪታትን ብደረጃ ዶክትሬት ዘሎ ጥቡቕ ርክብ ንምጥቃምን ንምርዳእን ዕድላት ዝፈጥር ምዃኑ ኣመልኪቱ’ሎ።
