ሽወደን፥ ትማል ሰንበት ብዝተኻየደ መጥቃዕቲ ብረት ሞትን መቚሰልትን ኣጋጢሙ

ትማሊ ሰንበት ድሕሪ ቀትሪ ኣብ ምዕራብ ሽወደን ኩንግስባካ ኣብ ዝርከብ ማእከል ዕዳጋ ብዝተፈጸመ ተኹሲ ሓደ ሰብ ምቚሳሉ ተሓቢሩ። እዚ ከምዚ ኢሉ እንከሎ ኣብ ማልሞ፡ ኣብ 50ታት ዕድመ ዝርከብ ሰብኣይ ትማሊ ንግሆ ኣብ መንበሪ ቤቱ ተቐቲሉ ተረኺቡ’ሎ። ፖሊስ ኣብ ክልቲኡ ጉዳያት ጥርጡራት ኣብ ትሕቲ ቀይዲ ኣእትዩ ምህላዉ ሬድዮ ሽወደን ጸብጺባ’ላ። ብኻልእ ዜና ኣብ ስቶክሆልም 11 ሽሕ ዓለምለኻውያን ተማሃሮ ምህላዎም፡ ብመሰረት “ኣካዳሚክ ፎረም ስቶክሆልም’’ከኣ ካብዞም ካብ ወጻኢ ዝመጹ ተመሃሮ ትሕቲ ሲሶ ዝኾኑ ጥራይ ትምህርቶም ምስ ወድኡ ኣብታ ሃገር ምንባር ከም ዝቕጽሉ ተሓቢሩ። ኣብዚ ቀውዒ፡ ኣብ ስቶክሆልም ዝርከቡ 250 ተማሃሮ ደረጃ ማስተርስ፡ ድሕሪ መርመራ ኣብ ዕዳጋ ሽቕለት ሽወደን ንኽኣትዉ ንኽህግዞም ዝዓለመ መደብ ይሳተፉ’ለዉ።

”ስራሕ ንምርካብ ናይ ብሓቂ ኣጸጋሚ ኮይኑ እዩ ጸኒሑ፡፡ በዚ ምኽንያት ድማ እየ ኣብቲ መደብ ተመዝጊበ። ብሓቂ ጌጋይ ኣበይ ምንባሩ ክፈልጥ ተስፋ ጌረ’ለኹ” ክብል ካብ ቱኒዝያ ክመሃር መጺኡ ኣብ ሽወደን ምንባር ዝቕጽል ዘሎ ኖርጃሃን ጀማ ገሊጹ’ሎ።