Credit: Pontus Lundahl/TT
ግብረሽበራ ድሕሪ ደጊም ኣባላት ውድባት ግብረሽበራ ብዝኾኑ ጉጅለታት ወይ ውልቀሰባት ዝፍጸም፡ ወይ ስነ-ሓሳባዊ ድራኸ
ዘለዎም ተግባራት ጎነጽ ጥራይ ተጌሩ ክግለጽን ብኡኡ ክድረትን ኣይግባእን ክብል ኣገልግሎት ስለያ ሽወደን ሳፖ ይሕብር። ኣብዚ
ቀረባ እዋን ኣብ ሽወደንን ዴንማርክን ኣብ ዝርከብ ኤምባሲታት እስራኤል ዘጋጠመ ፍንጀራ ምስ ኣባላት ሽወደናውያን ጕጅለታት
ምትእስሳር ከምዘለዎ ዝፍለጥ ኮይኑ፥ ሓላፊ ሃገራዊ ማእከል ገምጋም ስግኣት ግብረሽበራ ሳፖ ኣን-ዛ ሃግስትሮም፡ ግብረሽበራ
እንታይ ምዃኑ ዝገልጽ ትርጉኡ ክሰፍሕ ከምዘለዎ ኣተሓሳሲቡ’ሎ።
ብኻልእ ዜና–ብቕድሚ ትማሊ ሰንበት ኣብ መንጎ ስቶክሆልም ሃማርቢን ጁርጋርደንን ይካየድ ኣብ ዝነበረ ርሱን ጸወታ
ብምኽንያት ኣብ ተዓዘብቲ እተላዕለ ሽግራት ቅድሚ ውዱእ ግዜ ክቋረጽ ከም እተገብረ ተፈሊጡ።
“ሮኬት ዝትኩሱ ደገፍቲ ንኹዕሶ እግሪ ሽወደን ጅሆ ሒዞሞ ኔሮም” ይብል ኦሎፍ ሉንድ ጋዜጠኛ ኩዕሶ እግሪ ቲቪ4 ን ሬድዮ ሽወደን
ኣብ ዝሃቦ ሓበሬታ። ብቕድሚ ትማሊ ድሕሪ ቀትሪ ኣብ ባዶ ስታድዩም ዝተረፈ ጸወታ ክምላእ ተጌሩ፡ ሃማርቢ ድማ 2 ብ 0 ዓወት
ኣመዝጊባ’ላ።
