ኢንዱስትሪ ምክልኻል ሽወደን ሓደስቲ ሰራሕተኛታት ንምቚጻር ይሽገር

ምስ ኢንዱስትሪ ምክልኻል ርክብ ኣብ ዘለዎም ኩባንያታት ሓደስቲ ሰራሕተኛታት ምቑጻር ዝያዳ ዝተሓላለኸ ኮይኑ ምህላዉ፡ ኣብታ ኣህጒር ብሓፈሻ ሰፊኑ ዘሎ ውጡር ጸጥታዊ ኲነታት ከኣ ኲነታት ካብቲ ንቡር ግዜ ትርር ዝበሉ ንክኾኑ ደሪኹ ምህላዉ እዩ ዝግለጽ ዘሎ። ድሕረ ባይታ ኣመልከትቲ ግቡእ ምጽራይ ንምክያድ ግዜን ብዙሕ ጸጋታትን ዝሓትት ኮይኑ፡ ንናእሽቱ ትካላት ጸቕጢ ይፈጥር ኣሎ። ሓላፊ ትካል ምህንድስና ካማቴክ ፒተር ሩድቢ ንኣገልግሎት ዜና ሬድዮ ሽወደን ኣብ ዝሃቦ ሓበሬታ፡ መስርሕ ምልመላኦም ኣዝዩ ከምዝተቐየረ ሓቢሩ’ሎ።

ብኻልእ ዜና ኣብዚ እዋን’ዚ ልዕሊ 200 ሰራዊት ባሕሪ ኣመሪካ፥ ከም ኣካል ሓባራዊ ልምምድ “ኣርኪፔላጎ ኢንደቨር 24” ኣብ ደሴታት ስቶክሆልም፥ ክሊ ማይን ምድርን ናይ ምዕላብ ልምምድ የካይዱ’ለዉ። እቲ ጻዕሪ ብዕጡቕ ሓይሊ ሽወደንን ረጅመንት ባሕሪ ስቶክሆልምን ይምራሕ ምህላዉ ተፈሊጡ’ሎ።