ብምኽንያት ስግኣት ሃገራዊ ድሕነት ፍቓድ ስራሕ ሓለውቲ ጸጥታ ተሰሪዙ

ኣብዚ ዓመት ኣስታት 50 ሓለውቲ ጸጥታ ነቲ ስራሕ ብቑዓት ስለዘይኮኑ ኣብቲ ኢንዱስትሪ ንኽሰርሑ ዝነበሮም ፍቓድ ስኢኖም። ልዕሊ ሓደ ሕምሲት ካብዚኦም ንሕብረተሰብ ወይ ንሃገራዊ ድሕነት ከቢድ ሓደጋ ኮይኖም ዝተፈርዱ ሰባት ዘጠቓልሉ ምዃኖም ኣገልግሎት ዜና ሬድዮ ሽወደን ኣቃሊዓ’ላ። እዚ ንቐዳሞት ሓሙሽተ ኣዋርሕ ናይዚ ዓመት ዝሽፍን ኣሃዛት፡  ኣብ ኢንዱስትሪ ንምስራሕ ናይ መወዳእታ ውሳነ ብዝህቡ ቦርድታት ምምሕዳር ሽወደን ዝተመዝገበ እዩ።

እዚ እናኾነ ቅድሚ ሕጂ ገበን ዝፈጸሙን ኣሸገርቲን ተኻረይቲ፡ እቲ ገበን ኣብ ገዝኦም ወይ ኣብቲ ዝነብሩሉ ህንጻ ምስ ዝፍጸም ጥራይ እዮም ካብ መንበሪኦም ብሓይሊ ዝስጎጉ ዝነበሩ። ካብ ትማል ሶኑይ ኣትሒዙ ኣብ ግብሪ ዝውዕል ሓድሽ ሕጊ ግን እቲ ገበን ኣብ ቀረባ እንተተፈጺሙ ንወነንቲ ንብረት ናይ ምግፋፍ ስልጣን ክህብ እዩ። ማሕበር ተኻረይቲ ሽወደን ነቲ ሕጊ ኣትሪሩ ዝነቕፎ ኮይኑ፡ ንጹሃት ኣባላት ስድራቤት ክጽለዉ ከምዝኽእሉ ብምልዓል ተቓውሞኡ ኣቐሚጡ’ሎ።