Month: September 2018

ምምሕዳር ወረዳ ክኒቭስታ ካብ ብመቕጻዕቲ  መኪና ደው መበሊ( ፓርኪንግ) ዝኣከቦ ብሚልዮናት ዝቑጸር  ገንዘብ ናብ ተቕጻዕቲ ክመልስ ተገዲዱ። እቲ ምምሕዳር ከምዝሓበሮ፡ ምኽንያት ናይዚ ዉሳነ  ምምሕዳር ክኒቭስታ፡ ኣብዞም ዝሓለፉ ኣርባዕተ ዓመታት   ንመካይን ደዉ ዝብላሉ ቦታ፥ ዝሕሉን፥ ግቡእ ናይ ምቕጻዕ መሰል ዘሎዎ ኣካል ሓለዋ፥ ከይመደበ ብምጽንሑ፥ ስለዝተረጋገጸ ምኻኑ፡ ክብል ባዓል መዚ መገድታት እቲ ወረዳ፡ ክሪስቶፈር ክቫንስትሮም ንጋዜጣ ንያ ቲድኒንግ ኡፕሳላ ሓቢሩ። እቲ ብጌጋ ክእከብ ጸኒሑ ተባሂሉ ዘሎ ገንዘብ፡ ካብ ዓመተ 2014 ዝሕሰብ ኮይኑ፡ ኣብ ነፍሲ ወከፍ ዓመት፡ ብኣማኢት ኣሽሓት ዝትመን ገንዘብ ምዃኑ እቲ ሓላፊ ኣመልኪቱ። ብተወሳኺ ምምሕዳር ወረዳ ክኒቭስታ ምስ ባዓል መዚ መጓዓዚያ ሽወደን ብምዃን፡ ዋጋ ክሳራ ናይቲ ጌጋ ክንደይ ክኸዉን ከምዝኽእል ንምንጻር፡ ሓባራዊ ምርመራ ጀሚሮም ምህላዎም ክፍለጥ ተኻኢሉ ኣሎ።