ንገበነኛታት ዝምልከት ሓድሽ እማመ ቀሪቡ

ኣብ ሃገረ ሽወደን፡ ብሕጋዊ ይኹን ብዘይሕጋዊ ኣገባብ፡ ኣብዚ ሃገር ዝነብሩ ወጻእተኛታት ዝፍጽምዎ ገበናዊ ንጥፈታት፡ ካብ ግዜ ናብ ግዜ እንዳዓበየ ብምምጽኡ፡ ኣብ ፖለቲካዊ ሃዋህዉ ሽወደን፡ ኣካታዒ ሕቶ ብምዃን ኣብ ዝቕጽለሉ ዘሎ እዋን፡ ነቲ ብሽወደናዉያን ዜጋታት ዘይኮኑ ሰባት ዝካየድ ገበናዊ ንጥፈታት ንምዉጋድ፡ ብደረጃ መስርሕ ሕጊ፡ ንገበናዊ ንጥፈታት፡ ከም መምርሒ ሂወት ዝገበሩ ሰባት፡ ብናይ ቤት ፍርዲ ውሳኔ ጥራይ፡ ካብ ሃገር ክጥረዙ ዘኽእል ስልጣን፡ ኣብ ልሙድ ሕጊ ክታኣታቶ ብዝተፈላለዩ ወገናት ክቐርብ ዝጸንሐ ናይ ሕጊ እማመ፡ ተቐባልነት ረኺቡ፡ ናብ ጣዉላ መንግስቲ ቀሪቡ ከምዘሎ ተፈሊጡ።

ሚኒስተር ፍትሒ ሽወደን፡ ኣቶ ሞርጋን ዮሃንሶን፡ ነቲ እማመ ብኣወንታ ከምዝረኣዮን ኣብ ተግባር ንምዉዓሉ ከምዝሰርሕን ኣረዲኡ።

ኣብ ሽወደን፡ ኣብ ዓመት፡ ክሳብ 200 ዝኾኑ ጉዳያት ገበን፡ ብወጻእተኛታት ወይዉን ወጻእተኛ መበቆል ብዘሎዎም ሰባት፡ ከምዝካየድ ኣብዚ ቀረባ ዓመታት ኣተኲሩ ዝተኻየደ መጽናዕቲ ከምዘመልክት ኣገልግሎት ዜና ተተ ሓቢሩ።