ሎሚ ረቡዕ ንግሆ፡ ኣብ ምብራቓዊ ክፋል ስቶክሆልም፡ ኣብ ኦርሚንየ ከባቢ ናካ፡ ዝርከብ ኣግራብ ዝበዝሖ ኣከባቢ፡ ሰለስተ ካብ 18 ክሳብ 20 ዓመታት ዝዕድሚኦም መንእሰያት፡ ንሓንቲ ጓል ክዕምጹ ብምፍታኖም፡ ፖሊስ ይደልዮም ከምዘሎ ሓቢሩ።
እታ ብሰለስተ መንእሰያት መጥቃዕቲ ዝወረዳ ግዳይ ዝኾነት ጓል፡ ዓው ኢላ ድምጺ ብምግባርን ብምቅላስን ካብ ኢድ እቶም ዓመጽቲ ከተምልጥ ከምዝኸኣለት ወሃቢ ቃል ፖሊስ ስቶክሆልም፡ ፔር ፋልስትሩም፡ ን TT ኣብ ዝሃቦ ቃል ሓቢሩ።
ኩነታት ናይታ ግዳይ ዝኾነት ጓል፡ ሕክምናዊ ኣገልግሎት ዘየድልዮ ምንባሩ ድማ ተሓቢሩ። ፖሊስ፡ ነቶም ዓመጽቲ ንምርካብ ነቲ ከባቢ ፈቲሹ። ክሳብ ሕጂ ኣብ ትሕቲ ቀይዲ ዝኣተወ ሰብ ከምዘየለ ድማ ተሓቢሩ።
እቲ ፍጻመ ኣብ ዝተፈጸመሉ ቦታ፡ ፖሊስ፡ ቴክኒካዊ መርመራ ከምዘካየደ ሓቢሩ።
