ጸሓፊ ኔቶ ሃንስ ስቶለንበርግ ናብ መናውራ ኮልድ ሪስፖንስ ክበጽሕ እዩ።

ጸሓፊ ኔቶ ሃንስ ስቶለንበርግ ወተሃደራዊ ልምምዳት “ኮልድ ሪስፖንስ” ንምዕዛብ ብዓርቢ ናብ ባርዱፎስ ከም እተጓዕዘ ተፈሊጡ። ስቶለንበርግ ምስቶም ኣብዚ ልምምድ ዝሳተፉ ዘለዉ ወተሃደራት ተራኺቡ ጋዜጣዊ ዋዕላ ከካይድ ምዃኑ ኔቶ ሎሚ ኣብ ዘውጽኦ ጋዜጣዊ መግለጺ ኣፍሊጡ’ሎ። ካብ 27 ሃገራት ኔቶ እተዋጽኡ ኣስታት 30,000 ወተሃደራት ኣብዚ ክሳብ ባሕቲ ሚያዝያ ዝካየድ “ኮልድ ሪስፖንስ” ይሳተፋ ምህላወን ዝፍለጥ እዩ። 

ብሰኑይ ወራስ ዓራት ሃኮን ናብቲ ወተሃደራዊ ልምምድ ዝካየደሉ ዘሎ ካብ ናርቪክ ብሰሜን ወገን ዝርከብ ቦታ ብምኻድ ምብጻሕ ምክያዱ ተፈሊጡ። ኣብ ተመሳሳሊ መዓልቲ ቀዳመይቲ ሚኒስተር ማግዳሌና ኣንደርሾን ከምኡ’ውን መራሒ ሰልፊ ሞደራትና ኡልፍ ክሪስተርሰን ነቲ ናይ ልምምድ ቦታ ምብጽሖም ኖርወይ ቱደይ ወሲኻ ጸብጺባ።