ጆሺ ዝተሰምየ ጎሪላ ሓድሽ ህይወት ይጅምር

13 ዝዕድሜኡን መላእ ህይወቱ ኣብ ፓርክ ሳፋሪ ብሪጣንያ ዘሕለፈን፡ ጆሺ፡ ሓድሽ ህይወት ንኽጅምር ናብ ጫካታት ኮንጎ ብራዛቪል ከም እተፈነወ ተገሊጹ። ጆሺ ህድእ ዝበለ ባህርያት ስለዘለዎ ነዚ ሓድሽ ህይወት ከም እተሓርየ ድማ ተገሊጹ። ኣብ ጫካ ምንባር ቀሊል ብዘይምዃኑ ኣብ ጫካ ብዝተወልዱ ክልተ ጎሪላ ስልጠና ይውሃቦ ምህላዉ እቲ ሓበሬታ ወሲኹ ኣመልኪቱ። እዞም ክልተ ጎሪላ ኣዲኦም ብሃደንቲ ምስ ተቐትለት ዘኽቲሞም እዮም ዓብዮም። ህድእ ዝበሉ ጎሪላ ማረኽቲ ብምዃኖም ጆሺ ኣብቲ ጫኻ ቀልጢፉ መጻምዲን ስድራን ክምስርት ከም ዝኽእል ሓላፊ ኣስፒናል ፋውንዴሽን ኣሞጽ ካሬጅ ይገልጽ።