ትማሊ ረቡዕ፡ ብዛዕባ ኣብ ዕለት 6/01/2021 ዝተኻየደ ናዕቢ ብምጉስጓስን ምንህሃርን፡ ኣብ ልዕሊ ፕረዚደንት ኣሜሪካ፡ ዶናልድ ትራምፕ፡ ክሲ ንኽምስረት ዘኽእል እማመ ንምቛም ኣብቲ ብዓብላልነት ዲሞክራስያውያን ዝምራሕ፡ ባይቶ ኣሜሪካ፡ ዝተኻየደ መስርሕ ድምጺ፡ ዶናልድ ትራምፕ፡ ተሓታቲ ምዃኑ ከምዘድመጹ ተፈሊጡ።
እዚ እማመ፡ ናብቲ ብዓብላልነት ሪፓፕሊካውያን ዝምራሕ፡ ላዕለዋይ ባይቶ ኣሜሪካ፡ ንውሳኔ ተመሪሑ ከምዘሎ ክፍለጥ ተኻኢሉ ኣሎ።
እቲ ቀሪቡ ዘሎ እማመ፡ ፕረዚደንት ትራምፕ፡ ንደገፍቱ ብምቕስቓስን ምንህሃርን፡ ኣብ ልዕሊ ቤት ጽሕፈት ባይቶ ኣሜሪካ ናይ ምዕናውን ምስላብን ምቕታልን ንጥፈታት ከካይዱ ጎስጒሱ ዝብል ክሲ ዝሓዘ ኮይኑ፡ ንፕረዚደንት ትራምፕ፡ ብቕጥታ ካብ መዝነቱ ክእለን ኣብ ፍርዲ ክቐርብን ዝጽውዕ እዩ።
