ውድድር ሃብታማት ሰብ ጸጋ ዓለምና

ናብ ጠፈር መን ቀዳማይ በጽሐ ብዝብል፡ ሃብታማት ሰብ ጸጋ ዓለምና ዝኾኑ እንግሊዛዊ ሪቻርድ ብራንሶንን ኣሜሪካዊ ጀፍ ቤዞስን ኣብ ጽዑቕ ውድድር ተጸሚዶም ከምዘለዉ ተሓቢሩ።

ወዲ 70 ዓመት ዝኾነ ብራንሶን፡ ኣብ ዝቕጽል ሰሙን፡ ዕለት 11 ሓምለ፡ ኩነታት ኣየር እንተድኣ ምቹእ ኮይኑ፡ብዋንነት ኩባንይኡ ዝኾነት ቪርጅን ጋላክቲክ ዝተሰምየት ናይ ጠፈር መርከብ ኣቢሉ ክጓዓዝ ወሲኑ ከምዘሎን በዚ ድማ፡ ነቲ ኣብ ዕለት 20 ሓምለ፡ ብዋንነት ኩባንይኡ ዝኾነት ብሉ ኦሪጅንስ ዝተሰምየት ናይ ጠፈር መርከብ ኣቢሉ ጉዕዝኡ  ክፍጽም መዲቡ ዘሎ መወዳድርቱ ዝኾነ ጄፍ ቤዞስ፡ ቀዲሙ ናብ ጠፈር ክጓዓዝ ምዃኑ ተገሊጹ ኣሎ።

እዞም ክልተ ሃብታማት ሰብ ጸጋ ዓለምና ዝውንኑወን ኩባንያታት፡ ውልቀ ሰባት፡ ናብ ጠፈር ሓጺር ናይ ቱርዚም ጉዕዞ ንኽገብሩ፡ ኣገልግሎት ንኽህባ ምጽናዕቲ የካይዳ ምህላወን ተፈሊጡ ኣሎ።

ሽዱሽተ ተሳፈርቲ ክትሕዝ እትኽእል ቪርጅን ጋላክቲክ፡ ኣብ ዝሓለፈ ወርሒ ግንቦት፡ ንመጀመርታ ግዜ፡ ሰብ ጽዒና፡ናይ ፈተነ ጉዕዞ ድሕሪ ምክያዳ፡ ቅድሚ ሓደ ሰሙን ድማ ናብ ጠፈር ብሕታዊ በረራ ንኸተካይድ ፍቓድ ምርካባ ይፍለጥ።