ውድብ ጥዕና ዓለም፡ ኣብ ወቕቲ ጽድያ፡ 230 ሽሕ ኤውሮጳውያን ብኮቪድ ክሞቱ ይኽእሉ እዮም ክብል ገሊጹ

ኣብ ዝሓለፈ ሰሙን፡ መጠን ግዳያት ሞት ኮቪድ ብ 11% ወሰኽ ከም ዘርኣየን ክሳብ ባሕቲ ታሕሳስ፡ እዚ ቊጽሪ ናብ 230 ሽሕ ክብ ክብል ከም ዝኽእልን እቲ ውድብ ገሊጹ’ሎ። በዚ ድማ ዛጊት ዘይተኸትቡ ክቀላጠፉ ከም ዝግባእ ተመልኪቱ’ሎ።

መማህራን ቀዳምነት ክታበት ክወሃቦም ይግባእ ክብሉ ውድብ ጥዕና ዓለምን ዩኒሴፍን ትማሊ ሰኑይ ናይ ሓባር ቅዋም ምሓዞም ተፈሊጡ። ኣብያተ ትምህርቲ ኣውሮጳን ማእከላይ ኤስያን ክኽፈታን እቲ ንተመሃሮ ዘርብሕ ቀጥታዊ መኣዲ ትምህርቲ ክወሃብ እንተ ኮይኑ፡ መማህራንን ኣባላት ቤት ትምህርትን ከምኡ ውን እቶም ኣብ ሓደጋ ዘለዉ ኣባላት ሕብረተሰብ፡ ቀዳምነት ክትባት ክወሃቦም ይግባእ ክብል እቲ ዝወጸ ቅዋም ገሊጹ።

ብዘይካ’ዚ ውድብ ጥዕና ዓለምን ዩኒሴፍን፡ ኩለን ሃገራት፡ ንኹሎም እቶም ልዕሊ 12 ዝዕድሜኦም ቆልዑ ክኽተቡ ከተባብዓ ጸዊዑ።