ክታበት ፋይዘር፡ ኣብ ናእሽቱ ቆልዑ ክፍተን እዩ

ክታበት ፋይዘር፡ ኣብ ልዕሊ እቶም ክሳብ ሽዱሽተ ኣዋርሕ ዝዕድሚኦም ቆልዑ፡ ክፍተን ምዃኑ እቲ ኩባንያ ጽሒፉ ክብል ማዕከን ዜና ተተ ኣቃሊሑ።

እቲ ዝካየድ ፈተነ፡ ኣብ ፊንላንድ፡ ፖላንድ፡ ስፓኛን ኣሜሪካን ዝሰላሰል ኮይኑ፡ 4500 ቆልዑ ኣብቲ ፈተነ ክሳተፉ እዮም። ክሳብ ሕጂ፡ ክታበት ፋይዘር፡ ኣብ ኣሜሪካን ሃገራት ኤውሮፓዊ ሕብረትን ንልዕሊ 12 ዓመት ተፈቐዱ ምህላዉ ጸብጻባት ይሕብሩ።

ኣብቲ ዝካየድ ፈተነ፡ እቶም ካብ 5 ክሳብ 11 ዓመት ዝዕድሚኦም ቆልዑ፡ 10 ማይክሮግራም ክወሃቦም እንከሎ፡ እቶም ካብ 5 ዓመት ክሳብ 6 ኣዋርሕ ዘለዉ ቆልዑ ድማ 3 ማይክሮግራም ክወሃቦም እዩ።

ቆልዑ፡ ብሕማም ኮቪድ-19 ናይ ምልካፍ ተኽእሎታቶም ትሑት እዃ እንተኾነ፡ ንምስፍሕፋሕ ሕማም ኮቪድ ግን ከም ዓቢ ረቛሒ ስለዝቑጸሩ፡ ኣገዳስነት ክታበቶም ልዑል ገይርዎ ይርከብ።

ድሕሪ’ቲ ክካየድ ተሓሲቡ ዘሎ ፈተነ፡ ክታበት ፋይዘር፡ ነቶም ካብ 5 ክሳብ 11 ዓመት ዘለዉ ቆልዑ ኣብ ወርሒ መስከረም ክፍቀድ፡ ነቶም ካብ 6 ኣዋርሕ ክሳብ 5 ዓመት ዘለዉ ቆልዑ ድማ ኣብ ወርሒ ጥቅምቲ ወይ ሕዳር ክፍቀድ እቲ ኩባንያ ተስፍኡ ገሊጹ።