ክርስቲያኖ ሮናልዶ፡ ተሌፎን ሓደ ደጋፊ ዝሰበረሉ ምኽንያት ብፖሊስ ይምርመር ኣሎ

ኣጥቃዓይ ማንቸስተር ዩናይትድ፡ ክሪስትያኖ ሮናልዶ ተሌፎን ሓደ ደጋፊ ብምስባር ድሕሪ ምኽሳሱ፡ ፖሊስ መርሲሳይድ መርመራ ከም ዝጀመረ ተገሊጹ።

ኣብቲ ብማሕበራዊ መራኸቢታት ዝተዘርግሐ ቪድዮ፡ ጋንታኡ ምስ ኤቨርተን ኣብ ዝገበረቶ ግጥም 1 ብ 0 ተሳዒራ ካብ ሜዳ ኣብ ዝወጽኣሉ ዝነበረ እዋን፡ ንሓንቲ ቴለፎን ክሕምሽሽ እንከሎ ይርአ።

እቲ ወዲ 37 ዓመት ሮናልዶ ድሒሩ ኣብ ማሕበራዊ መራኸቢታት ኣብ ዝዘርግሖ መልእኽቲ፡ ይቕሬታ ሓቲቱ።

ፖሊስ መርሲሳይድ ብቐዳም ኣብ ጉዲሰን ፓርክ ከምዝተፈጸመ “ዝተገለጸ ጥቕዓት” መርመራ ይገብር ምህላው ገሊጹ።

ኣፈኛ ፖሊስ ከምዝሓበሮ፡ ምስ ክለባት ማንቸስተር ዩናይትድን ኤቨርተንን ብምትሕብባር ይሰርሑ ኣለው።

“እቶም ተጻወትቲ ሰዓት 2፡30 ካብ ሜዳ ይወጽኡ ኣብ ዝነበሩሉ፡ ሓደ ቘልዓ ብሓደ ካብቶም ተጻወትቲ መጥቃዕቲ ተፈጺምዎ” ኢሉ።